Snapdragon 8 Gen 4 prosessoru barəsində ilk məlumatlar verilib

    Qualcomm hələ Snapdragon 8 Gen 3 prosessorunu təqdim etmədiyi bir vaxtda insayderlər artıq Snapdragon 8 Gen 4 barəsində məlumatlar verməyə başlayıblar. Snapdragon 8 Gen 4 prosessoru yalnız gələn il təqdim olunacaq və o, Android cihazlar üçün nəzərdə tutulmuş 3 nanometrlik prosessorlar arasında ilklərdən olacaq. Onun istehsalı ilə TSMC şirkəti məşğul olacaq. Məlumatda qeyd edilib ki, Snapdragon 8 Gen 4-ün əsas fərqləndirici özəlliyi ondan ibarət olacaq ki, o özündə Nuvia startapının Phoenix adlı nüvələrini birləşdirəcək. Qeyd etmək lazımdır ki, Qualcomm şirkəti sözügedən startapı 2021-ci ildə almışdı.

    Məlumata əsasən Snapdragon 8 Gen 4-ün tərkibinə 2 ədəd Phoenix I nüvəsi və 6 ədəd Phoenix M nüvəsi daxil olacaq. Sözügedən nüvələrin Geekbench-in bir nüvəli testi çərçivəsində 2070 xal, çox nüvəli testi çərçivəsində isə 9100 xal topladıqları iddia edilir. Müqayisə üçün qeyd etmək lazımdır ki, bu ilin sonuna yaxın təqdim ediləcək Snapdragon 8 gen 3 prosessorunun Geekbench-in bir nüvəli testi çərçivəsində 1800 xal, çox nüvəli testi çərçivəsində isə 6500 xal toplayacağı gözlənilir. Snapdragon 8 Gen 4-ün bu cür diqqət çəkən göstəricilərinə baxmayaraq insayderlər tərəfindən bu qədər tez verilmiş məlumatlara şübhə ilə yanaşmaqda fayda var.