Snapdragon 8cx Gen 4 prosessoru Apple M2-ni üstələyə bilib

    Qualcomm şirkəti smartfonlarla yanaşı həmçinin kompüterlər üçün də prosessorların hazırlanması ilə məşğul olur. Şirkət hal hazırda bu istiqamətdə Snapdragon 8cx Gen 4 adlı yeni prosessoru üzərində çalışır. Ortaya çıxmış yeni məlumata əsasən şirkət bu yeni prosessorun hazırlanması prosesində ciddi nailiyyətlər əldə edib. Qeyd etmək lazımdır ki, Snapdragon 8cx Gen 4 öz növbəsində Apple şirkətinin M seriyasına daxil olan prosessorları ilə rəqabət aparmalıdır.

    Məlumata əsasən Qualcomm-un kompüterlər üçün nəzərdə tutulmuş prosessorunda Oryon adlı fərdi nüvələrə keçid etməsi öz bəhrəsini verib. Belə ki, Snapdragon 8cx Gen 4 prosessoru performans baxımından Apple M2-ni bir qədər üstələyir. Lakin qeyd etmək lazımdır ki, Apple M2 prosessoru bir neçə versiyaya sahibdir. Söhbət Apple M2 Pro, M2 Max və M2 Ultra-dan gedir. Snapdragon 8cx Gen 4-ün bu prosessorlar qarşısında hansı nəticələrə sahib olduğu bilinmir. Məlumata əsasən Snapdragon 8cx Gen 4 prosessoru 3 versiyaya sahibdir və onların hamısı özlərində 12 ədəd nüvəni birləşdirirlər.