Son Dəqiqə: Samsung şirkəti Galaxy Note 9 və Galaxy Watch'u təqdim etdi

    Nəhayət ki, Samsung şirkəti Galaxy Note 9 smartfonunu təqdim etdi. Yeni model flaqman özəlliklər, təkmilləşdirilmiş kamera, yeni S Pen funksiyaları və böyük həcmli batareya əldə edib. Beləliklə Galaxy Note 9 HDR10 dəstəkli 6.4 inç Quad HD+ (2960x1440 piksel keyfiyyətli) keyfiyyətli Super AMOLED ekrana sahibdir. Smartfonun kənar hissələri əvvəlki modellərdə olduğu kimi əyilmiş formadadır. Çərçivələr isə bir qədər nazikləşdirilib. Əsas texniki göstəricilərə gəldikdə isə Galaxy Note 9 2.8 GHz tezlikdə çalışan 8 nüvəli Snapdragon 845 / 2.7 GHz tezlikdə çalışan 8 nüvəli Exynos 9810 prosessoru (satışa çıxacaq ölkədən asılı olaraq prosessorlar dəyişir), 6/8 GB RAM, 128/512 GB daxili yaddaş və Quick Charge 2.0 sürətli enerji yığma özəllikli 4000 mAh enerji tutumlu batareya ilə təchiz olunub.

    Smartfon 12 MP + 12 MP ikili arxa kamera və f/1.7 diafraqmalı 8 MP-lik ön kameraya sahibdir. Arxa kameraların əsas özəlliklərindən biri də f/1.5 diafraqmasından f/2.4 diafraqmasına keçid etmək mümkünlüyüdür. Bunun sayəsində yaxşı işıqlandırılmamış mühitdə daha keyfiyyətli fotolar əldə etmək olar. Həmçinin kameralar, optik stabilizasiya, optik və rəqəmsal zoom, 2160p keyfiyyətində və Super Slow-Mo videoçəkiliş özəlliklərini dəstəkləyir. Barmaq izi skanı texnologiyası arxa kameranın aşağı hissəsində yerləşir. Smartfonun sol tərəfində səsin tənzimlənməsi düymələri və Bixby səsli köməkçisinin aktiv edilməsi üçün düymə yerləşir. USB Type-C girişi, 3.5 mm-lik audiogiriş və S Pen stilusu üçün xüsusi yer smartfonun aşağı hissəsində yerləşir. Həmçinin Galaxy Note 9 iki SIM kart girişini və 1 TB-a kimi microSD özəlliyini dəstəkləyir. Smartfonda bu qədər sayda girişin olmasına baxmayaraq IP68 standartı üzrə sudan və tozdan qorunma xüsusiyyəti smartfonu layiqincə qoruyur.

    Galaxy Note seriyasının digər modellərdən fərqləndirən əsas özəlliyi onun S Pen adlı stilusa sahib olmasıdır. Galaxy Note 9-da olan yeni S Pen stilusu isə Bluetooth modul ilə təchiz olunub. Bunun sayəsində ondan uzaq məsafədə idarəedici kimi istifadə etmək olar. Bununla yanaşı S Pen həmdə smartfon kamerasının və media kontentin idarəsi, təqdimat zamanı slaydların dəyişdirilməsi kimi funksiyaları dəstəkləyir. Stilus smartfonda yerləşən zaman avtomatik olaraq şarj olunur. Barmaq izi skanından başqa smartfon həmçinin göz qişası skanı və Face Unlock texnologiyasına da sahibdir. Beləliklə 6 GB RAM və 128 GB daxili yaddaşa sahib versiya 1000$, 8 GB RAM və 512 GB daxili yaddaşa sahib versiya isə 1250$ qiymətinə satılacaq. Satışlara 24 Avqust tarixindən start veriləcək.

    Galaxy Note 9 smartfonundan əlavə olaraq Samsung şirkəti həmdə özünün yeni smart saat modelini təqdim etdi. Yeni smart saat modeli Galaxy Watch adlanır. Yeni Galaxy Watch iki ölçüdə satışa çıxarılacaq: 46 mm və 42 mm. Buna baxmayaraq hər iki versiya böyük ölçüdə fiziki düymələrə sahibdir. Hər iki smart saat versiyası MIL-STD-810G standartı üzrə sertifikatlaşdırılıb. Buna görə də onlar rahatlıqla 50 metr su dərinliyinə dözə bilərlər.

    Hər iki versiya 2 nüvəli Exynos 9110 prosessoru, 768 MB RAM və 4 GB daxili yaddaş ilə təchiz olunub. Smart saatlar Wearable OS 4.0 əməliyyat sistemi vasitəsilə çalışırlar. Galaxy Watch yenilənmiş S Health tətbqini dəstəkləyir və ürək döyüntülərinin təyin olunması üçün ötürücülər ilə təchiz olunub. Həmçinin smart saat stress vəziyyətini təyin edir və ona idmanla bağlı məşqləri xatırladır. Galaxy Watch-da həmçinin Bluetooth 4.2, Wi-Fi, NFC və GPS texnologiyaları da var. 42 mm ölçüyə sahib versiya 270 mAh, 46 mm ölçüyə sahib versiya isə 472 mAh enerji tutumlu batareya ilə təchiz olunub. Smart saatların çıxış tarixi hələki məlum olmasa da onların Galaxy Note 9 ilə bir gündə satılacağı güman olunur. Onların təqribi qiyməti isə 349$ təşkil edə bilər.