SpaceX bu il reallaşdırılmış uçuş missiyalarının sayı baxımından yeni rekorda imza atıb

    4 sentyabr səhər saatlarında SpaceX şirkəti il ərzində reallaşdırılan orbital uçuşlar üzrə yeni rekorda imza atdı. Yeni rekordun əldə olunması üçün şirkətə 8 aydan bir qədər çox vaxt lazım oldu. 2022-ci ildə SpaceX ümumilikdə 61 uğurlu uçuş reallaşdırmışdı. 2023-cü ilin 8 ay və 4 günü ərzində isə şirkət ümumilikdə 62 uğurlu uçuş missiyası reallaşdırıb. Formal olaraq bu ilin ilk uçuşu ilə 62-ci uçuşu arasında 8 ay vaxt keçib.

    4 sentyabr tarixində SpaceX-in Falcon 9 raketi Florida ştatındakı kosmodromdan start götürərək Yer kürəsinin orbitinə 21 ədəd Starlink peykini çatdırıb. Yer kürəsinin orbitində olan Starlink peyklərinin sayı artıq 5000-i keçib. Hal hazırda SpaceX kosmik uçuşlar sahəsində lider şirkətdir. Müqayisə üçün qeyd etmək lazımdır ki, bu ilin əvvəlindən başlayaraq Çin 39, Rusiya isə 12 uğurlu kosmik uçuşu reallaşdıra bilib.