Elon Musk-ın sözlərinə əsasən SpaceX şirkəti bu il ərzində Starship-in hazırlanmasına 2 milyard dollar investisiya yatırmalıdır. Qeyd etmək lazımdır ki, şirkət hal hazırda Starship-in prototipinin ilk orbital uçuşunun reallaşdırılması üçün növbəti cəhd üzərində çalışır. 20 aprel tarixində Starship-in prototipi orbital uçuşun reallaşdırılması prosesi zamanı havada partladı. Musk-ın fikrincə Starship-in ilk orbital uçuşunun ikinci cəhdi 6-8 həftədən sonra reallaşdırıla bilər.

    Bununla belə şirkət bu il ərzində Starship layihəsinin inkişaf etdirilməsinə əlavə maliyyə cəlb etmək məcburiyyətində qalmayacaq. Orbital uçuşun ilk cəhdi çərçivəsində Starship-in Meksika körfəzi üzərində partlamasına baxmayaraq Musk həmin uçuşu gözləntiləri qarşılamış uçuş kimi qiymətləndirir. Hal hazırda şirkət Starship-in müxtəlif növ prototiplərinə sahibdir və onların hər biri müxtəlif hazırlanma prosesindədir. Lakin ABŞ Mülki Aviasiya İdarəsi şirkətə orbital uçuşların keçirilməsi məsələsində müəyyən müddətlik qadağa tətbiq edib.