SpaceX raketinin 4 tonluq hissəsi Ay səthinə çırpıldı

    NASA bildirib ki, SpaceX-ə məxsus Falcon 9 raketinin ötən il kosmosa buraxıldıqdan sonra orbitdə qalan üst pilləsi Ay səthinə çırpılıb. Söhbət Firefly Aerospace şirkətinin Blue Ghost 1 Ay eniş aparatını daşıyan Falcon 9 raketinin təxminən 4 ton ağırlığında olan üst pilləsindən gedir. NASA-nın məlumatına görə, Günəş aktivliyi və Ayın cazibə qüvvəsi nəticəsində obyektin trayektoriyası dəyişib və o, Ayın Einstein və Bell kraterləri yaxınlığında səthə düşüb.

    Alimlərin hesablamalarına əsasən, toqquşma nəticəsində təxminən 18 metr enində və 3,5 metr dərinliyində yeni krater yaranıb. NASA qeyd edir ki, belə hadisələr qeyri-adi görünsə də, Ay orbitində fəaliyyət göstərən bəzi missiyalar üçün istifadə olunmuş raket pillələrinin Ay səthinə yönləndirilməsi texniki baxımdan qəbul edilən və təhlükəsiz üsullardan biridir. Agentlik bu toqquşmadan əldə olunacaq məlumatların həm kosmik obyektlərin izlənilməsi, həm də Ay səthinin geologiyası və toqquşma zamanı yaranan toz buludlarının öyrənilməsi baxımından faydalı olacağını bildirir.