SpaceX şirkəti Starlink istifadəçilərini peyk internet şəbəkəsində olmuş dəyişikliklər barəsində məlumatlandırıb. Belə ki, şirkət gələn aydan başlayaraq limitsiz internet trafiki ləğv edəcək. Bununla belə aylıq ödəniş haqqında dəyişiklik olmayacaq. Starlink-in bəzi müştəriləri artıq bu dəyişikliyə narazılıqlarını bildiriblər və qeyd ediblər ki, şirkətin söz verdiyi internet sürəti ilə real göstəricilər üst-üstə düşmürlər. Starlink-dən istifadə üzrə yeni şərtlərə əsasən SpaceX prioritet tarifi istifadəçiləri üçün aylıq 1 TB həcmində trafik təyin edib. Bu limitin keçilməsi halında hər 1 GB trafik istifadəçiyə 0.25$ qiymətinə başa gələcək.

    Standart tarif bu cür məhdudiyyətə sahib deyil. Lakin onun sürəti daha aşağıdır. SpaceX-in statistikasına əsasən Starlink istifadəçilərinin yalnız 10%-i ayda 1 TB-dan artıq trafik istifadə edir. Buna baxmayaraq 599$ qiymətinə satılan Starlink təchizatını ön sifariş etmiş istifadəçilər bu yeni dəyişikliklərdən narazı qalıblar. Onların narazılıqları həmçinin o qədər də yüksək olmayan internet sürəti ilə bağlıdır. Belə ki, şirkət prioritet tarifində saniyədə 50-200 Mbit internet sürəti söz vermişdi. Reallıqda isə sözügedən tarifdə internet sürəti saniyədə 20-100 Mbit təşkil edir. Bununla belə bu tarifin aylıq abunə haqqı 110$-dır.