İnsan tərəfindən generasiya olunan rəqəmsal məlumatın sayı yüksək temp ilə artır. Lakin məlumatların saxlanması üçün nəzərdə tutulmuş fiziki cihazların inkişaf səviyyəsi o qədər də yüksək sürətlə getmir. Buna görə də bulud sistemlərin yaradılması üçün şirkətlər daha çox sərt disk almağa məcbur qalırlar. Bu problemi Microsoft şirkətinin yeni texnologiyası həll edə bilər. Belə ki, şirkətin yeni texnologiyası terabaytlarla həcmdə olan məlumatları kvars parçasına yazmağa imkan verir. Bu barədə Techradar saytı xəbər verib.

    Microsoft Project Silica layihəsi kvarsdan hazırlanmış yüksək dözümlü şüşə üzərinə lazer vasitəsilə məlumatların yazılması texnologiyasına əsaslanır. Bununla belə sözügedən proses zamanı lazer kvarsdan hazırlanmış şüşənin strukturunu deformasiya edir. Təcrübə çərçivəsində tədqiqatçlar 2.5 düym disk ölçüsündə olan əridilmiş kvars parçasına 75.6 TB həcmində məlumat yaza biliblər. Müqayisə üçün qeyd etmək lazımdır ki, 3.5 düym ölçüsündə olan ən həcmli sərt disk 20 TB təşkil edir.

    Lakin Microsoft Project Silica layihəsinin mütəxəssislərinin qarşılaşdıqları ən əsas problem ondan ibarətdir ki, kvars materialdan hazırlanmış sərt diskdəki məlumatları yenidən yazmaq mümkün deyil. Belə ki, bu disk yalnız məlumatların oxunmasında istifadə oluna bilər. Bu isə məlumatların ehtiyat versiyalarını hazırlamaqda çətinliklər yarada bilər. Qeyd etmək lazımdır ki, bu cür texnologiya üzərində təkcə Microsoft şirkəti deyil həmçinin digər şirkətlər də çalışırlar. Analitiklərin fikirlərinə əsasən 2025-ci ilə kimi bütün dünyada olacaq rəqəmsal məlumatların həcmi 175 ZT (zettabayt) təşkil edəcək. Müqayisə üçün qeyd etmək lazımdır ki, 1 ZT milyard TB-a bərabərdir.