Tesla Cybertruck-ın interyer dizaynının fotoları ilk dəfə ortaya çıxıb

    Tesla səhmdarları arasında keçirilmiş görüşün iştirakçılarından biri yenilənmiş Tesla Cybertruck pikapının daxilində olub. Nəticədə həmin şəxs Tesla Cybertruck-ın salon dizaynının ilk fotolarını təqdim edib. Qeyd etmək lazımdır ki, Tesla Cybertruck-ın xarici görünüşünün necə olacağı məlum olsa da, onun interyer dizaynı indiyənə kimi sərgilənmirdi. Təqdim edilmiş fotolardan belə qənaətə gəlmək olar ki, Tesla-nın elektrikli pikap modelinin interyeri şirkətin digər elektromobillərinin salon interyerləri ilə müqayisədə daha minimalistik olacaq. Görmək olar ki, Tesla Cybertruck-ın sükanı arxasında Model S-də olduğu kimi göstəricilər paneli olmayacaq.

    Bununla yanaşı elektrikli pikapın sükanı Tesla-nın digər elektromobillərindəki sükanlara bənzəmir. Elektrikli pikapın qeyri-adi gövdə formasına sahib olması səbəbilə daxildən ön şüşənin alt hissəsində böyük ölçülü boş sahə mövcuddur. Təbii ki, Tesla-nın digər elektromobillərində olduğu kimi Cybertruck-ın salonunda da böyük ölçülü sensorlu ekran yerləşdirilib. Həmin sensorlu ekran sükanın arxa hissəsində olmalı olan göstəricilər panelini əvəz edir və üstəlik elektromobilin multimedia sistemi rolunda çıxış edir. Tesla Cybertruck-ın bu ilin üçüncü rübündə satışa çıxacağı gözlənilir.