Xiaomi öz elektromobilləri üçün fərdi prosessor üzərində çalışır

     Özünün 15 illiyini qeyd edən Xiaomi ötən ay Xring O1 və Xring T1 adlarını daşıyan, özünün hazırladığı iki mobil prosessoru təqdim etmişdi. Bu çiplər əsasən smartfonlar və taxıla bilən elektronika üçün nəzərdə tutulub. Lakin şirkət həmçinin avtomobil sektoru üçün xüsusi prosessor üzərində də çalışır. Bu barədə məlumatı Xiaomi-nin təsisçisi Lei Jun investorlar üçün keçirilmiş tədbirdə verib. Hazırda Xiaomi avtomobil sahəsində istifadə üçün nəzərdə tutulan ilk prosessorunu hazırlayır və bu çipin tezliklə rəsmi təqdimatı baş tuta bilər.

     Lei Jun bu çipin sürücüyə aktiv dəstək sistemlərində istifadə olunacağını, yoxsa yalnız avtomobilin əyləncə və məlumat sistemi ilə məhdudlaşacağını dəqiqləşdirməyib. Xatırladaq ki, Xiaomi yaxın bir neçə il ərzində öz prosessorlarının hazırlanmasına azı 7 milyard dollar sərf etməyi planlaşdırır. Dünən məlumat ortaya çıxdı ki, ABŞ proqram təminatından istifadə ilə bağlı yeni ixrac məhdudiyyətləri Xiaomi-nin öz prosessorlarını hazırlamaq qabiliyyətinə ciddi təsir göstərəcək.

     Hətta şirkət Çin mənşəli proqram təminatına keçsə belə, əldə olunan layihələri Tayvanın TSMC şirkətinin ekosisteminə uyğunlaşdırmaq lazım gələcək. TSMC isə çip hazırlama prosesində ABŞ-ın proqram təminatından istifadə etməyə davam edir, bu isə əlavə çətinliklər yarada bilər. Xiaomi-nin təsisçisi əlavə edib ki, YU7 krossover modelinin tövsiyə olunan satış qiyməti bu ilin iyulunda bazara çıxmasına cəmi bir neçə gün qalmış açıqlanacaq. O həmçinin vurğulayıb ki, Xiaomi bu sahədə rəqiblərlə qiymət müharibəsinə girmək niyyətində deyil.