Bir neçə müddət bundan öncə Xiaomi şirkətinin yeni Pocophone F2 smartfon modelinin render fotoları yayılmışdı. Həmin vaxtda yayılmış məlumatlarda qeyd olunurdu ki, sözügedən smartfon modeli Xiaomi şirkətinin Snapdragon 855 prosessorlu ən ucuz cihazı olacaq. İndi isə smartfon barəsində yeni məlumatlar ortaya çıxıb və həmin məlumatlar bir qədər məyusluğa səbəb olub.

    Belə ki, Pocophone F2 smartfonu məşhur Geekbench bençmark saytında ortaya çıxıb və bençmark məlumatına əsasən yeni smartfonda Snapdragon 855 prosessorunu gözləməyə ehtiyac yoxdur. Beləliklə Pocophone F2 modeli Snapdragon 845 prosessoru və 6 GB RAM ilə təchiz olunacaq və Android 9.0 Pie əməliyyat sistemi vasitəsilə çalışacaq. Smartfon Geekbench-in birnüvəli testində 2321 xal, çoxnüvəli testində isə 7564 xal toplayıb.

    Bundan əlavə olaraq smartfonun yeni render fotosu da ümidləri doğrultmayıb. Belə ki, yeni render fotolarından da görmək olar ki, Pocophone F2 modeli ikili arxa kamera ilə təchiz olunacaq və V şəkilli çıxıntı hissəyə sahib olacaq. Əvvəlki məlumat sızıntılarında isə qeyd olunurdu ki, smartfon ekran üzərində ön kamera üçün kiçik dairəvi hissəyə və arxa paneldə 4 kameraya sahib olacaq. Yeni render fotoda smartfonun arxa panelində barmaq izi skanı texnologiyası yerləşir. Fotodan da görmək olar ki, smartfonun ön panelinin aşağı hissəsi bir qədər qalın çərçivəyə sahibdir. Beləliklə Pocophone F2-nin sadəcə ekran üzərindəki çıxıntı hissədən başqa əvvəlki modeldən nə ilə fərqlənəcəyi bilinmir.