Xiaomi Xring O1 mobil prosessoru təqdim edilib

     Xiaomi şirkəti daha öncə də anons etmiş olduğu kimi Xring O1 adlı yeni mobil prosessorunu təqdim edib. Xiaomi-nin sözlərinə əsasən bu yeni prosessor Apple A18 Pro-dan daha ucuz başa gəlir və enerji sərfiyyatının effektivliyi baxımından onu geridə qoyur. Xring O1 prosessoru 3 nanometrlik texnoloji proses əsasında hazırlanıb və o, 10 nüvəyə sahibdir. Nüvələr prosessorun tərkibində “2 + 6 + 2” sxemi üzrə yerləşiblər. Yəni prosessor özündə 3.9 GHz tezlikdə çalışan 2 ədəd Cortex-X925 nüvəsini, 1.9 GHz-dən 3.4 GHz-ə kimi çalışan 6 ədəd Cortex-A725 nüvəsini və 1.8 GHz tezlikdə çalışan 2 ədəd Cortex-A520 nüvəsini birləşdirir. Prosessorun qrafik imkanlarından isə 16 nüvəli Immortalis-G925 cavabdehdir. Prosessor həmçinin 6 nüvəli neyron çipinə sahibdir və bu çipin performansı 44 TOPS təşkil edir. Xiaomi bildirib ki, o, Xring O1-in hazırlanmasına 4 il vaxt və bu müddət ərzində bu layihəyə 1.87 milyard dollar vəsait sərf edib. Hal-hazırda Xring O1 kütləvi istehsal prosesindədir.