Yaponiya insanabənzər axtarış-xilasetmə robotlarını hazırlayacaq

     Yaponiyanın elektronika istehsalçısı Murata Manufacturing Co. və Vaseda Universiteti bir neçə yerli şirkətlə birlikdə insanabənzər axtarış-xilasetmə robotlarının hazırlanması üzərində işləyirlər. Bu fəaliyyət, əvvəllər dünya lideri olmuş Yaponiyanın robot texnologiyaları sektorunun yenidən canlandırılmasına yönəlmiş daha geniş proqramın bir hissəsidir. Kiotoda yerləşən robot istehsalçısı Tmsuk Co. və Tokiodan olan Sre Holdings Corp. daxil olmaqla 4 şirkət yalnız yerli Yapon komponentlərindən istifadə etməklə robot yaratmaq niyyətində olduqlarını bildiriblər.

     Hazırda onların məqsədi 3 metr hündürlüyündə və 300 kq çəkidə insanabənzər robot hazırlamaqdır. Bu robot saatda təxminən 5 km sürətlə hərəkət edə biləcək və 100 kq-dan artıq yük qaldıra biləcək. İstehsalçılar əmindirlər ki, belə xilasetmə robotları Yaponiyaya çox lazımdır, çünki ölkə təbii fəlakətlərə ciddi şəkildə məruz qalır. “Biz insandan qat-qat güclü və dağıntıları hərəkət etdirə bilən robot yaratmaq istəyirik” - deyə Tmsuk şirkətinin rəhbəri Yoichi Takamoto bildirib.

     Keçmişdə Yaponiya insanabənzər robotların yaradılması sahəsində dünya lideri olub. Vaseda Universiteti hələ 1973-cü ildə dünyanın ilk tamölçülü ikiayaqlı robotu WABOT-1-i hazırlamışdı. İndi isə tərtibatçılar geridə qalanları bərpa etmək və ABŞ və Çin istehsalçıları ilə fərqi azaltmaq üçün tam funksional xilasetmə robotu yaratmağa çalışırlar. Robotun prototipinin 2026-cı ildə təqdim olunması, onun kütləvi istehsalına isə 2029-cu ildə başlanılması planlaşdırılır.