Tesla 29 990 dollarlıq sürücüsüz Cybercab üçün satış dəvətləri göndərir

    “Tesla” seçilmiş müştərilərə şəxsi istifadə üçün “Cybercab” almaq dəvətləri göndərməyə başlayıb. 2 nəfərlik sürücüsüz avtomobil 29 990 dollara (təxminən 50 980 manat) satılır. Bundan başqa, alıcı hər ay “Autonomy Subscription” abunəsi üçün 299 dollar (təxminən 510 manat) ödəməlidir. Sükanı və pedalları olmayan avtomobil yalnız abunə aktiv qaldıqda işləyəcək.

    “Cybercab” yalnız “Tesla”nın “Robotaxi” xidmətinə açdığı məhdud zonalarda hərəkət edə biləcək. Hazırda bu zonalar Floridada Miami, Orlando və Tampa, Texasda isə Austin, Dallas, Fort Worth, Houston və San Antonionun müəyyən hissələrini əhatə edir. Abunə dayandırılsa, avtomobili ümumi yollarda sürmək olmayacaq, çünki onu əl ilə idarə etmək olmur. Aylıq ödənişə sürücüsüz idarəetmə, texniki xidmət və yedəkləmə daxildir. Sığorta haqqını isə avtomobil sahibi ayrıca ödəməlidir.

    Sifariş növbəsinə qoşulmaq üçün geri qaytarılmayan 1000 dollar (1700 manat) depozit ödəmək lazımdır. Çatdırılma 2026-cı ilin dekabrına planlaşdırılır, amma şirkət bu tarixə zəmanət vermir. İlk mərhələdə avtomobillərin sayı da məhdud olacaq. Aylıq ödənişlərin 5 il ərzində ümumi məbləği 17 940 dollara (təxminən 30 500 manat) çata bilər. Vergi, enerji doldurma və sığorta xərcləri hesablanmadan avtomobilə ümumilikdə təxminən 47 600 dollar (80 920 manat) xərclənəcək.

    “Tesla” sentyabrda Austində “Cybercab” səfərlərinə başlayıb. Avtomobillər “Model Y” modellərinin də işlədiyi “Robotaxi” xidmətinə qoşulub. Hazırda 278 “Cybercab” istismardadır və onlar ümumi robotaksi parkının təxminən 40 faizini təşkil edir. Satış qaydalarına görə, şəxsi avtomobildən “Uber”, “DoorDash” və ya “Tesla Robotaxi” şəbəkəsində pul qazanmaq üçün istifadə etmək olmaz. Şirkətin süni intellekt bölməsinin rəhbəri Ashok Elluswamy deyib ki, müştərilərə satılan avtomobillər şəbəkəyə 2027-ci ilin 2-ci rübündə qoşula bilər.

    ABŞ-nin Milli Magistral Yol Hərəkəti Təhlükəsizliyi Administrasiyası “Cybercab”ın ödənişli xidmətdə işləməyə başlamasından sonra yoxlama açıb. Qurum sükan, pedallar və yan güzgülər kimi daimi idarəetmə vasitələri olmayan avtomobilin təhlükəsizlik tələblərinə uyğunluğunu “Tesla”nın özünün təsdiqləməsi prosesini araşdırır. Şirkət hüquqi əsaslandırmasını oktyabrda təqdim edib və sənədin məxfi qalmasını istəyib. Qurum hələ qərar vermədiyinə görə avtomobilin ümumi yollarda istifadəsi ilə bağlı hüquqi qeyri-müəyyənlik davam edir.

    “Tesla” şəxsi sığorta şirkətlərinin sürücüsüz avtomobili necə sığortalayacağını açıqlamayıb. Avtomobil sürücüsüz hərəkət edərkən qəza baş verərsə, məsuliyyətin sahibi ilə şirkət arasında necə bölünəcəyi də bilinmir. Dəvət alanların hansı meyarlarla seçildiyi və şəxsi satış üçün neçə avtomobil ayrıldığı da açıqlanmayıb. Elon Musk aylıq 299 dollarlıq ödənişi yüksək sayıb və 115 dolların (təxminən 200 manat) daha uyğun olacağını deyib.