Whoop Humans adlı fitnes və sağlamlıq üçün sosial şəbəkəni təqdim etdi

    “Whoop” noyabrın 12-də “Whoop Humans” adlı yeni sosial şəbəkəsini açıb. Fitnes və sağlamlıq platformasının bu bölməsi dostları və ailə üzvlərini real sağlamlıq göstəriciləri əsasında birləşdirir. Şirkətin məlumatına görə, hər hesab ürək döyüntüsü cihazla qeydə alınan real şəxsə bağlıdır. “Whoop” yeni şəbəkəni botların, süni intellektlə hazırlanmış paylaşımların və saxta maraq yaradan məzmunun geniş yayıldığı ənənəvi sosial platformalara alternativ kimi göstərir.

    “Whoop Humans” istifadəçiləri yuxu, bərpa və fiziki yük göstəricilərini paylaşa bilirlər. Fiziki fəaliyyət məlumatlarını, hədəfləri və nailiyyətləri də seçilmiş şəxslərə göstərmək olur. Dostlar paylaşımlara reaksiya verə, şərh yaza və yaxınlarına dəstək ola bilərlər. “Whoop Moments” funksiyası da məşq fotolarını, şəxsi təcrübələri və vacib nəticələri paylaşmaq üçündür.

    Paylaşılan bədən göstəriciləri birbaşa “Whoop” cihazlarından, o cümlədən “Whoop 5.0” modelindən götürülür. İstifadəçi hansı məlumatı kimin görəcəyini və onu kimin izləyəcəyini özü seçir. Bu ayarları istənilən vaxt dəyişmək olur. Həssas sayılan fəaliyyətlər standart olaraq gizli qalır, “Stealth Mode” rejimi də məlumatları müvəqqəti gizlədir. Şirkətin sözlərinə görə, “Whoop” şəxsi sağlamlıq məlumatlarını satmır və kommersiyalaşdırmır.

    Yeni sosial şəbəkə “Whoop Teams” funksiyasını əvəz etmir. Hazırda üzvlərin 57 faizi ən azı 1 komandaya qoşulub və qrupdakı reytinq cədvəllərində yarışa bilir. “Teams” tətbiqin “Community” bölməsində qalacaq, amma “Humans” funksiyasının altında görünəcək. “Humans” daha çox yaxın insanların gündəlik vəziyyətini izləmək və ehtiyac olduqda onlara dəstək olmaq üçündür.

    “Whoop Humans” bütün “Whoop” abunəliklərinə əlavə ödənişsiz daxildir və tətbiqdə mərhələli şəkildə açılır. Funksiyanı işlətmək üçün “Whoop” cihazı taxmaq və aktiv üzvlüyü saxlamaq lazımdır. İllik abunə planları 199 dollardan (təxminən 340 manat) başlayır və 359 dollara (təxminən 610 manat) çatır. Cihaz da üzvlük paketinə daxildir. Şəbəkəyə qoşulmaq üçün hesab cihazın qeydə aldığı real ürək döyüntüsü ilə əlaqələndirilməlidir.