ABŞ-da işçi vizasının qiyməti artdığı üçün Avropa xarici mütəxəssisləri özünə cəlb etməyə başlayıb

     Donald Trump keçən həftə yüksək texnologiyalar sahəsində işləmək üçün H-1B tipli vizalarla əcnəbiləri dəvət edən ABŞ şirkətlərinə əlavə rüsumlar tətbiq edəcəyini bildirib. Bu dəyişikliklər yalnız Hindistan və Çin əsilli mütəxəssislər arasında deyil, həm də Avropa şirkətləri arasında rezonans doğurdu. Avropalılar vəziyyəti daha çox istedadlı əcnəbiləri öz heyətlərinə cəlb etmək üçün bir fürsət kimi gördülər. Məlumata görə, məşğulluqla bağlı ixtisaslaşmış platformalarda Avropa biznes nümayəndələri Trump-ın yeni təşəbbüsləri səbəbindən ABŞ-da işlərini itirmə təhlükəsi ilə üzləşən mütəxəssisləri dəvət etməyə başlayıblar. Xatırladaq ki, ABŞ prezidenti xaricdən mütəxəssis dəvət edən şirkətləri onların vizaları üçün ilkin müraciət zamanı 100 000$ ödəməyə məcbur edib. H-1B tipli vizalar 3 ilə qədər müddətə verildiyi üçün bəzi işçilərin vizalarının müddəti hazırda bitmək üzrə ola bilər.

     Onların uzadılması ödənişsiz vəd olunsa da, xüsusilə narahat olan əməkdaşların gözündə bu, zəmanətli görünmürdü. Nəticədə bir çoxuna ABŞ-dan xarici səfərlərini ləğv etmək və təcili şəkildə ölkəyə qayıtmaq tövsiyə olundu. Belə göstərişləri bilavasitə amerikalı işəgötürənlər yayırdılar. Hətta Ağ Evin müəyyən sahələr, məsələn, tibb üzrə çalışanlar üçün güzəştli viza şərtlərini qorumaq niyyətinə dair açıqlamaları belə yaranmış panikanı aradan qaldıra bilmədi. Britaniya startapı Cleo, məsələn, bu dəyişikliklərdən narahat olan H-1B vizası sahiblərinə və namizədlərə London ofisindəki 100-dən çox vakansiya üzrə işə düzəlməyi təklif edib. Digər britaniya şirkəti - Synthesia-nın nümayəndəsi vurğulayıb ki, bu ölkədə H-1B vizası olmadan da “Silikon Vadisi səviyyəsində” iş tapmaq mümkündür. Şotlandiya şirkəti Wordsmith-in rəhbəri Ross McNairn bəyan edib ki, onunla işləməyə gələn mühəndislər üçün Britaniya vizalarının alınma xərclərini ödəməyə hazırdır.

     Böyük Britaniya və Avropa Birliyində bir çox texnologiya şirkəti rəhbərləri namizədlərin köç xərclərini qarşılamağa və rəqabətədavamlı maaşlar təklif etməyə hazır olduqlarını bildiriblər. Hətta Britaniya hökumətində ən yüksək ixtisaslı xarici mütəxəssislər üçün viza rüsumunun ləğvi təşəbbüsü müzakirəyə çıxarılıb. Mütəxəssislər hesab edirlər ki, işəgötürənlərin əlavə ödəniş etmədən formal olaraq uzada biləcəkləri mövcud H-1B vizalarına bəzi güzəştlərə baxmayaraq, ABŞ hakimiyyəti bu məhdudiyyətləri tətbiq etməklə süni intellekt sahəsində liderliyi qorumaq işini özü üçün çox çətinləşdirir. Kiçik büdcəli startaplar xaricdən dəyərli işçiləri dəvət edə bilməyəcəklər, bəzi şirkətlər isə ölkədən kənara köçməyi üstün tutacaqlar. Ümumilikdə, islahatların nəticələri ABŞ texnologiya sahəsi üçün mənfi olacaq.

     South China Morning Post nəşri xəbər verib ki, Çin əsilli ABŞ şirkətlərinin əməkdaşları yalnız turistik səfərləri deyil, həm də sentyabr ayında Çində keçirməyi planlaşdırdıqları toy mərasimlərini də ləğv etməli olublar. Onların 20 sentyabrda təcili qaydada Çindən ABŞ-a qayıtmaları lazım gəlib, çünki amerikalı işəgötürən mövcud H-1B vizalarının uzadılması şərtlərində dəyişikliklərdən ehtiyatlanaraq bunu tələb edib. Zərərçəkmiş gələcək bəy və gəlin ABŞ-a qayıtdıqdan sonra öyrəniblər ki, vizalarına heç bir təhlükə yoxdur. Lakin toy mərasimini Çində keçirmək artıq mümkün olmayıb və nəticədə o, qısaldılmış formada onların iştirakı olmadan baş tutub. Qonaqlara isə yalnız ABŞ-da olan yeni evlənənlər tərəfindən çəkilmiş videolar nümayiş etdirilib. Bu qarışıqlığın səbəblərindən biri də ABŞ rəsmilərinin vizaların verilmə şərtlərindəki dəyişikliklərlə bağlı açıqlamalarında ziddiyyətlərin olması idi. Buna görə şirkətlər və onların əməkdaşları riskə getməmək üçün ehtiyat tədbirləri görüb və ötən həftə ölkə xaricində olan bir çox H-1B vizası sahibləri təcili qaydada ABŞ-a qayıdıb.