Amazon 14 000 nəfər işçisini ixtisar edəcək

     Məlumata görə, Amazon şirkət ofislərində çalışan təxminən 14 000 əməkdaşını ixtisar etməyi planlaşdırır. Kütləvi ixtisarlar elektron ticarət nəhənginin xərcləri azaltmaq proqramının bir hissəsi kimi gözlənilirdi, lakin onların miqyası əvvəlcə mediada bildirildiyi kimi 30 000 nəfərlik səviyyəyə çatmadı. Gözlənilən ixtisarlar barədə əməkdaşlara bu həftə Amazon-un baş vitse-prezidenti Beth Galetti məlumat verib. O bildirib: “Bu gün elan etdiyimiz ixtisarlar, bürokratiya səviyyəsini azaltmaq, maneələri aradan qaldırmaq və resursları yenidən bölüşdürməklə mövqelərimizi daha da gücləndirməyə yönəlmiş işimizin davamıdır. Məqsədimiz - ən perspektivli sahələrə və müştərilərimizin hazırkı və gələcək ehtiyacları üçün ən vacib istiqamətlərə investisiya yatırmaqdır”.

     Bununla belə, Galetti hansı vəzifələrin ixtisar olunacağını və bu qərarın Amazon-un hansı regionlarını əhatə edəcəyini dəqiqləşdirməyib. Onun sözlərinə görə, ixtisara düşən işçilərin çoxuna şirkət daxilində yeni vəzifə tapmaq üçün 90 gün vaxt veriləcək. “Bəzi insanlar soruşa bilər ki, əgər şirkət yaxşı fəaliyyət göstərirsə, niyə ixtisarlar aparırıq. Bu süni intellekt nəsli - internetin yaranmasından bəri gördüyümüz ən çevriliş yaradan texnologiyadır və o, şirkətlərə innovasiyaları həm mövcud bazar seqmentlərində, həm də tamamilə yeni sahələrdə heç vaxt olmadığı qədər sürətlə tətbiq etməyə imkan verir. Biz əminik ki, daha təşkilatlanmış olmalı və fəaliyyətimizi bu istiqamətdə qurmalıyıq” - deyə Galetti bildirib.

     Galetti əlavə edib ki, Amazon 2026-cı ildə əsas strateji sahələrdə əməkdaşların işə qəbuluna davam edəcək. Bununla yanaşı, şirkət səmərəliliyi artırmaq üçün imkanlar axtarmaqda davam edəcək - bu da, çox güman ki, gələcəkdə əməkdaş sayının yenidən azaldıla biləcəyinə işarədir. Amazon-da ilk böyük ixtisarlar 2022-ci ilin sonu və 2023-cü ilin əvvəlində baş vermişdi - həmin vaxt şirkətdən 27 000 nəfər ayrılmışdı.