Amazon məlumat mərkəzi olan icmalara 1 milyard dollar vəd edir

    “Amazon” süni intellekt üçün məlumat mərkəzlərinin tikintisinə etirazlar artdığı bir vaxtda ictimaiyyətə yeni vədlər verib. “Amazon Web Services” rəhbəri Matt Garman cümə günü deyib ki, belə layihələrin dayandırılması ABŞ iqtisadiyyatı və milli təhlükəsizliyi üçün uzunmüddətli zərər yarada bilər. Hazırda ölkə üzrə məlumat mərkəzlərinin tikintisini müvəqqəti dayandırmaqla bağlı 100-dən çox təklifə baxılır.

    Şirkət “Data Center Commitment” adlı plan çərçivəsində məlumat mərkəzlərinin yerləşdiyi icmalara növbəti 5 il ərzində 1 milyard dollar (təxminən 1,7 milyard manat) yatıracağını vəd edir. Pul pulsuz icma kolleci proqramlarına və peşə hazırlığına ayrılacaq. Həmçinin məktəblərdə, evlərdə və ictimai binalarda enerjidən daha səmərəli istifadə üçün işlər görüləcək. “Amazon” yerli elektrik tariflərinin artmasının qarşısını almağı və yeni iş yerləri açmağı da planlaşdırır.

    “Amazon” yerli hakimiyyət və dövlət qurumları ilə məlumatı açıqlamamaq haqqında NDA razılaşmalarından artıq istifadə etmədiyini də açıqlayıb. Belə müqavilələr rəsmilərin layihənin nə qədər enerji və su işlədəcəyi, hətta mərkəzi hansı şirkətin tikdiyi barədə ictimaiyyətə danışmasını məhdudlaşdırırdı. Şirkətin hüquq məsələləri üzrə rəhbəri David Zapolsky əvvəlki məxfilik qaydasını sahənin köhnə vərdişi adlandırıb və artıq buna ehtiyac qalmadığını deyib.

    Məxfilik razılaşmalarını qadağan etməyə çalışan ştatların sayı da artır. Pensilvaniya, Massaçusets və Delaver rəhbərləri bununla bağlı sərəncamlar imzalayıblar. Nyu York, Nyu Cersi, İndiana və Ohayoda da qadağalar müzakirə olunub. Konqresdə hər iki partiyadan olan üzvlər “No Secrets for Data Centers Act” adlı qanun layihəsi irəli sürüblər. Nümayəndə Jamie Raskin “Amazon”, “Google”, “Meta” və “Oracle” şirkətlərindən NDA razılaşmaları barədə məlumat istəyib.

    Məxfilik qaydaları bir neçə layihədə problem yaradıb. Arizonanın “Tucson” şəhərində yerli rəsmilər NDA səbəbindən mübahisəli mərkəzin arxasında “Amazon”un dayandığını ictimaiyyətə deyə bilməmişdi. Şirkət sonradan layihədən çıxıb. İndiananın “South Bend” şəhərində 13 milyard dollar (təxminən 22,1 milyard manat) sərmayə yatırılan kampusla bağlı bəzi sualların da həmin müqavilələrə görə cavabsız qaldığı iddia edilib.

    Luizianada nəhəng “Hyperion” məlumat mərkəzi planlaşdırılarkən müxtəlif dövlət qurumlarının bağladığı gizli razılaşmaların mühüm rol oynadığı üzə çıxıb. Texasın Wharton dairəsində yerli məmur müqaviləni birbaşa “Amazon”la deyil, layihədə çalışan “VisionFirst Advisors” podratçısı ilə bağlamışdı. “Amazon” yeni məxfilik qaydasının belə podratçılara da aid olub-olmadığını açıqlamayıb.

    Garman su və elektrik sərfiyyatı, dizel generatorları, iş yerləri və ətraf mühitlə bağlı bəzi iddiaları “yanlış məlumat və açıq yalanlar” adlandırıb. Onun sözlərinə görə, xarici ölkələrin ABŞ-də məlumat mərkəzlərinə etirazı artırmaq üçün qəsdən yanlış məlumat yaydığı barədə xəbərlər var. Mütəxəssislər isə xüsusilə Çinlə bağlı bu iddianın şişirdildiyini, geniş kampaniyanı təsdiqləyən sübutların az olduğunu deyirlər. İctimai dəstəyin azalması və süni intellektin təhlükəsizliyi ilə bağlı narahatlıqlar da yerli etirazları gücləndirir.