Apple-ın Çində süni zəka xidmətlərini işə salmaq prosesi dayandırılıb

     Çin tənzimləyici orqanı, Apple və Alibaba tərəfdaşlığı ilə hazırlanmış süni zəka əsaslı xidmətlərin təsdiqlənməsi prosesini dayandırıb. Bu gecikmə, Donald Trump administrasiyasının ticarət siyasətinin ABŞ və Çin arasında yaratdığı gərginliklə bağlıdır. Apple və Alibaba, Çin istifadəçiləri üçün Apple Intelligence adlı, Alibaba-nın süni zəka modelləri üzərində qurulmuş xidmətlər paketini təqdim etməyi planlaşdırırdılar. Lakin Çin Kiberməkanda İdarəetmə İdarəsi (CAC) bu müraciətin baxılmasını dayandırıb. Məlumata əsasən səbəb Vaşinqton və Pekin arasında artan geosiyasi gərginlikdir. Apple, iki ölkə arasındakı münasibətlərin pisləşməsindən birbaşa zərər görür. Tim Cook-un Trump administrasiyası ilə əlaqələri düzəltmək cəhdlərinə baxmayaraq, şirkət təzyiq altındadır.

     Çünki prezident istehsalın Çindən ABŞ-a köçürülməsini tələb edir və Apple və Samsung cihazlarına 25%-lik gömrük rüsumları ilə hədələyir. Süni zəka xidmətlərinin işə salınmasında yaranan gecikmələr Apple şirkətinin vəziyyətini daha da ağırlaşdırır. Şirkət Çində bazar payını onsuz da itirməkdədir. IDC məlumatlarına görə, Apple-ın Çin bazarındakı premium seqmentdəki payı 2023-cü ilin əvvəlindəki 70%-dən bu ilin birinci rübündə 47%-ə düşüb. Əksinə, Huawei öz payını 13%-dən 35%-ə yüksəldib. Qeyd olunur ki, Çində süni zəka xidmətləri təklif edən bütün xarici şirkətlər CAC-in təsdiqini almalıdır və bu, bütün modellərin istifadədən əvvəl məcburi şəkildə test edilməsini tələb edir. Apple bu prosesi sürətləndirmək üçün Çin şirkəti Alibaba ilə əməkdaşlıq etsə də, texnologiya nəhəngləri arasındakı bu əməkdaşlıq yüksək diqqətə səbəb olub və yoxlamaları daha da sərtləşdirib.

     Bundan əlavə, biznes dairələrində yayılan məlumatlara görə, Çin hakimiyyəti bu tənzimləyici tədbirlərdən ABŞ ilə aparılan ticarət danışıqlarında təzyiq vasitəsi kimi istifadə edir. Yekun qərar isə eyni zamanda ABŞ-la gömrük rüsumlarının azaldılması ilə bağlı danışıqlar aparan Çin tərəfindən veriləcək. ABŞ Ticarət Nazirliyinin Sənaye və Təhlükəsizlik Bürosu da Apple və Alibaba arasında əməkdaşlıqla bağlı narahatlığını ifadə edib. Lakin ABŞ hökumətinin bu tərəfdaşlığı bloklamaq üçün hüquqi alətləri yoxdur. Daha əvvəl Alibaba şirkətinin sədri Joe Tsai təsdiqləmişdi ki, şirkət Çində iPhone üçün süni zəka funksiyalarına texnologiya təqdim edəcək. Apple bu vəziyyəti şərh etməkdən imtina edib. Alibaba, CAC və Çin Xalq Respublikasının Dövlət Şurası isə sorğulara cavab verməyib.