Google ödənişlə öz həllərinin Apple və digər şirkətlərin cihazlarında starndart istifadəsini davam etdirəcək

     ABŞ dairə məhkəməsinin elan edilmiş qərarına görə, Google Apple və digər şirkətlərlə müqavilələr bağlayaraq onların cihazlarında və məhsullarında öz axtarış sisteminin və digər standart həllərinin istifadəsini davam etdirə biləcək. “Google-un distribusiya tərəfdaşlarına Google Search, Chrome və ya GenAI məhsullarının əvvəlcədən yüklənməsi və ya yerləşdirilməsi üçün ödəniş etməsi və ya digər mükafat təklif etməsi qadağan olunmayacaq” - Kolumbiya dairəsinin məhkəmə hakimi Amit Mehta qərarında bildirib. “Google-un ödənişləri dayandırması, demək olar ki, mütləq distribusiya tərəfdaşlarına, əlaqəli bazarlara və istehlakçılara ciddi, bəzi hallarda isə bərpaolunmaz ziyan vurardı ki, bu da ödənişlərə geniş qadağaya qarşı çıxır” - deyə o, ABŞ Ədliyyə Nazirliyinin Google-a qarşı antiinhisar iddiası çərçivəsində qəbul etdiyi qərarda vurğulayıb.

     Dinləmələr zamanı Mozilla-nın maliyyə direktoru bildirib ki, Firefox brauzeri Google ilə müqavilə olmadan məhvə məhkum olacaq. Xatırladaq ki, yalnız 2022-ci ildə Apple cihazlarında Safari brauzerində Google axtarış sisteminin standart olaraq istifadəsinə görə ona 20 milyard dollardan çox ödəniş edilib. Dairə məhkəməsinin qərarına əsasən, Google öz məhsullarında belə adlandırılan “seçim ekranını” da göstərmək məcburiyyətində deyil.

     Bu qərar daha geniş bir məhkəmə hökmünün tərkib hissəsi kimi qəbul edilib və həmin hökmə görə, Google-un biznesi bölməsi və Chrome brauzerini və ya Android platformasını satması tələb olunmur - halbuki bunu ABŞ Ədliyyə Nazirliyi istəyirdi. Bununla yanaşı, Google indi rəqibləri ilə müəyyən axtarış məlumatlarını bölüşməli olacaq ki, bu da ABŞ Ədliyyə Nazirliyinin və ştatlar koalisiyasının tələbləri siyahısında yer almışdı. Ötən il hakim Mehta Google-un axtarış sistemləri bazarını qanunsuz şəkildə monopoliyalaşdırmaqda təqsirli olduğunu müəyyən edən qərar çıxarmışdı və hazırkı qərar isə hüquqi müdafiə tədbirlərinin tətbiqi ilə bağlı məhkəmə araşdırmasından sonra qəbul edilib.