İnvestorlar Apple-a qarşı kollektiv məhkəmə iddiası qaldırıblar

     Apple şirkətinin bir qrup səhmdarı San-Fransiskodakı federal məhkəməyə kollektiv iddia təqdim edərək şirkəti 2024-cü ildə təqdim edilmiş Apple Intelligence çərçivəsində süni zəka əsaslı funksiyaların hazırlıq səviyyəsini şişirtməkdə ittiham edib. İddiaçılara görə, Apple süni zəka tətbiqi ilə Siri səsli köməkçisinin gələcək inkişafı barədə verdiyi bəyanatlarla investorları aldadıb və bu da şirkətin səhmlərinin dəyərinə və investisiya qərarlarına təsir göstərib.

     Əsas epizod kimi 2024-cü ilin iyununda keçirilmiş WWDC konfransı göstərilir. Həmin konfransda şirkət Apple Intelligence və Siri üçün gələcək imkanların istifadəyə veriləcəyini elan etmişdi. Lakin sonradan məlum oldu ki, tam funksional istifadəyə verilmə əvvəlcə 2025-ci ilə, daha sonra isə 2026-cı ilə təxirə salınıb. İddiaçılar bildirirlər ki, təqdimat zamanı Apple-ın əslində hazır məhsulu olmayıb. 2025-ci ilin əvvəlindən etibarən Apple-ın səhmləri təxminən 25% dəyər itirib ki, bu da şirkətin bazar dəyərinin təxminən 900 milyard dollar azalmasına səbəb olub.

     İş üzrə cavabdeh qismində şirkətin rəhbəri Tim Cook, maliyyə direktoru Kevan Parekh və sabiq maliyyə direktoru Luca Maestri göstəriliblər. Şirkət Apple Intelligence layihəsini Siri-nin növbəti inkişaf mərhələsi və süni zəkanın öz cihazlarına inteqrasiyası kimi təqdim etmişdi. Lakin əslində istifadəçilərə yalnız mətn generasiyası, təsvir yaradılması və mətnin xülasələnməsi kimi əsas funksiyalara çıxış imkanı verildi. Yeni Siri isə hələ də inkişaf mərhələsindədir. İnvestorlar qərarlarını şirkətin rəsmi elanlarına əsaslanaraq verdikləri üçün vəd edilən məhsulun olmaması maliyyə itkilərinə səbəb olub. Bu da iddia üçün əsas səbəb kimi göstərilir.