Qlobal smartfon tədarükü 2026-cı ilin 3-cü rübündə 20 faiz azalıb

    “Counterpoint Research” şirkətinin hesabatına görə, 2026-cı ilin iyul-sentyabr aylarını əhatə edən 3-cü rübdə qlobal smartfon tədarükü 20 faiz azalıb. Bu, son 14 ilin 3-cü rübləri arasında ən aşağı nəticədir. Smartfon bazarı 2012-ci ildən bəri görünməyən səviyyəyə enib. Azalmanın əsas səbəbləri yaddaş çatışmazlığı, hissələrin bahalaşması və tədarükdə davam edən məhdudiyyətlərdir.

    Telefonlarda məlumatların saxlanması və emalı üçün işlədilən DRAM və NAND yaddaşları bahalaşmağa davam edib. Bu da istehsal xərclərini ciddi şəkildə artırıb. Nəticədə smartfon qiymətləri ilin əvvəlindən 20 faiz artıb. Alıcılar telefonlarını daha gec dəyişməyə və yenilənərək təkrar satışa çıxarılan cihazlara üstünlük verməyə başlayıblar. Buna baxmayaraq, daha bahalı modellərə tələbat sabit qalıb.

    “Samsung” 23 faizlik bazar payı ilə liderliyini qoruyub. Ötən ilin eyni dövründə şirkətin payı 19 faiz idi. Beləliklə, pay 4 faiz bəndi artsa da, tədarük həcmi 3 faiz azalıb. Avqustun əvvəlində satışa çıxan “Galaxy Z Fold8”, “Fold8 Ultra” və “Flip8” modellərinə ilkin maraq bu nəticədə mühüm rol oynayıb. Ən çox diqqəti “Galaxy Z Fold8” çəkib.

    “Apple”ın tədarük həcmi azalsa da, bazar payı 18 faizdən 22 faizə qalxıb. Şirkət 3-cü rüblər tarixində ilk dəfə 20 faizlik həddi keçib. Bununla da lider “Samsung”la fərq 1 faiz bəndinə düşüb. Standart “iPhone 18” satışa çıxmadığı üçün elan ayında mağazalara göndərilən cihazların sayı ötənilki tam “iPhone 17” seriyası ilə müqayisədə az olub. Bununla belə, “iPhone 18 Pro” modellərinin ilk satışları Çin və Hindistanda daha güclü olub. “iPhone 17” seriyasına davam edən maraq da azalmanın təsirini zəiflədib. Qiymət artımları yalnız rübün son həftələrində hiss olunub.

    Çin brendləri 3-cü rübü ciddi azalma ilə başa vurub. “Xiaomi”nin tədarükü 30 faizdən çox düşüb, bazar payı da 14 faizdən 10 faizə enib. “OPPO” və “vivo” telefonlarının tədarükündə 20 faizdən çox azalma olub. “OPPO”nun bazar payı 12 faizdən 9 faizə düşüb. “vivo”nun payı da 9 faizdən 8 faizə enib.

    Hesabata görə, 2026-cı ilin qalan hissəsində bazardakı çətinliklər davam edəcək. İstehsalçılar daha çox cihaz göndərmək əvəzinə gəlirlərini qorumağa çalışacaq. Bunun üçün istehsalı azaldıb diqqəti bahalı modellərə yönəldəcəklər. Qiymətə həssas alıcılar daha çox çətinliklə üzləşə bilər. Hissələr ucuzlaşmayana və tədarük yaxşılaşmayana qədər bazarda ciddi bərpa gözlənilmir.