SpaceX ABŞ-də öz mobil şəbəkəsi üçün 80 min rabitə sahəsinə çıxış istəyir

    “SpaceX” ABŞ bazarında öz mobil şəbəkəsini qurmaq üçün ən azı 80 min mobil rabitə sahəsinə çıxış əldə etmək istəyir. Planla bağlı danışıqlar 22 oktyabrda üzə çıxıb. Şirkətin danışdığı tərəflər arasında böyük qüllə operatoru “Crown Castle” da var. Razılaşmalar baş tutsa, “SpaceX” “AT&T”, “Verizon” və “T-Mobile”dan sonra bütün ölkəni əhatə edən növbəti böyük mobil operator ola bilər.

    “SpaceX” bu ay ABŞ üzrə 800 MHz aşağı tezlik zolağını almağa razılaşıb. Bu tezlikdəki siqnallar daha geniş əraziyə yayılır və binaların daxilinə daha yaxşı çatır. ABŞ Federal Rabitə Komissiyası telefonlara birbaşa qoşulacaq 15 min “SpaceX” peykini də təsdiqləyib. Şirkət peyk rabitəsini yerdəki avadanlıqla birləşdirərək “Starlink”in işlədiyi ərazilərdə daha geniş bağlantı yaratmaq istəyir.

    80 min sahə ABŞ-də ötən il işlək olan 158 500 xüsusi mobil qüllənin təxminən yarısıdır. “Crown Castle” təxminən 40 min, “American Tower” isə 42 min qüllə idarə edir. “Vertical Bridge”in nəzarətində də 18 min qüllə var. Ancaq planda mobil rabitə sahələrindən danışılır və hər sahə ayrıca qüllə deyil. Müqayisə üçün, ölkənin 3 böyük operatorunun hər biri 65 minlə 82 min arasında qüllədən yararlanır.

    Belə bir ümummilli yerüstü şəbəkənin qurulmasının 80 milyard dollardan çox (136 milyard manatdan çox) xərcə başa gələcəyi hesablanır. İşlərin illərlə davam edəcəyi gözlənilir. Digər tərəfdən, “Dish” vaxtilə “Crown Castle”ın 12 mindən çox sahəsində avadanlıq quraşdırıb, lakin sonradan şəbəkədən imtina edib. Həmin sahələr üçün icazə və torpaqla bağlı prosedurlar artıq tamamlanıb. Buna görə yeni operator bu sahələrdən yararlanaraq şəbəkəni daha sürətli qura bilər.

    “Crown Castle” rəhbəri Chris Hillabrant şirkətin bütün maraqlı tərəflərlə danışdığını deyib, lakin müştərilərin adlarını açıqlamayıb. Onun sözlərinə görə, “SpaceX” qüllələri birbaşa icarəyə götürə bilər. Bu addım hazırkı operatorları da şəbəkələrinə daha çox pul yatırmağa sövq edə bilər. Xəbərdən sonra “Crown Castle” səhmləri birja bağlandıqdan sonra 10 faizə qədər bahalaşıb. Ölkənin 3 böyük operatorunun səhmləri isə 4,2% ilə 5% arasında ucuzlaşıb.

    Bəzi mütəxəssislər 80 min rəqəminə şübhə ilə yanaşır. Onların fikrincə, ən nikbin ssenaridə 75 min sahə kifayət edə bilər. Peyklər və müştərilərin evlərindəki “Starlink” avadanlığı qüllə ehtiyacını azalda bilər. Ancaq bu avadanlıq həmişə bağlantının lazım olduğu yerlərdə quraşdırılmır. Digər seçim MVNO razılaşmasıdır. Bu modeldə “SpaceX” başqa operatorun hazır şəbəkəsindən yararlanaraq mobil xidməti öz adı ilə sata bilər. Ölkənin 3 böyük operatoru belə əməkdaşlığı rədd edib. Bununla belə, “T-Mobile” ilk “Starlink Mobile” xidmətinin ABŞ-dəki eksklüziv tərəfdaşıdır.