Tərtibatçılar kütləvi şəkildə App Store-dan uzaqlaşırlar

     ABŞ məhkəməsi Apple-ın xarici ödənişlər üçün tətbiq etdiyi 27% komissiyanı qanunsuz elan etdikdən sonra, tərtibatçılar kütləvi şəkildə alternativ ödəniş sistemlərinə keçməyə başlayıblar. Bloomberg-in məşhur insayderi Mark Gurman-ın yazdığına görə, Apple tərtibatçıları öz ekosistemi daxilində saxlamaq üçün App Store-dakı komissiya faizini azalda bilər. Ekspertlər hesab edirlər ki, bu dəyişikliklər yaxın vaxtlarda baş verə bilər. Daha əvvəl Apple alternativ ödənişlərə müəyyən şərtlərlə icazə verirdi. Yəni tərtibatçılar istifadəçiləri “xarici sistemlərin riskləri” barədə xəbərdar etməli və şirkətə 27% komissiya ödəməli idilər. Bu isə faktiki olaraq mənfəəti sıfıra endirirdi, çünki əksər ödəniş xidmətləri təxminən 3% komissiya alır.

     İndi isə, 9to5Mac saytının məlumatına görə, məhkəmə qərarına əsasən bu məhdudiyyətlər aradan qaldırılıb və bir çox tərtibatçı Apple-ın daxili ödəniş sistemindən imtina etməyə başlayıb. App Store Apple-a illik təxminən 20 milyard dollar gəlir gətirir və bu məbləğ əsasən 15-30% arası komissiyalar hesabına formalaşır. Gəlirləri qorumaq üçün şirkət ya məxfilik və təhlükəsizlik mövzusuna daha çox önəm verməli, ya da komissiya faizlərini azaltmalıdır. Gurman-ın fikrincə, Apple yaxın vaxtlarda tariflərini dəyişməyə məcbur olacaq, əks halda daha çox tərtibatçını itirmək riski ilə üzləşəcək.

     Hal-hazırda Apple məhkəmə qərarından apellyasiya şikayəti verib, lakin bu proses uzana bilər. Bu müddət ərzində, əgər şirkət komissiya siyasətini yenidən nəzərdən keçirməsə, əhəmiyyətli gəlir itkisinə uğraya bilər. Bununla belə, kiçik və orta səviyyəli tərtibatçıların Apple ilə əməkdaşlığa davam edəcəyi ehtimal olunur - xüsusilə tariflər daha sərfəli olarsa. Üstəlik, Apple-ın daxili ödəniş sistemi istifadəçilər üçün daha rahatdır: Kart məlumatlarını daxil etməyə ehtiyac yoxdur, sadəcə iki dəfə düyməyə toxunmaq kifayətdir.

Mənbə: 9to5mac