Trump administrasiyası Apple-a yenidən təzyiq göstərib

     Hələ may ayının ortalarında ABŞ prezidenti Donald Trump Çin məhsullarına tətbiq olunmuş artırılmış gömrük rüsumlarından sonra Apple şirkətinin podratçılarının Hindistanda daha fəal şəkildə istehsal müəssisələri tikməyə başlamasından narazılığını ifadə etmişdi. Son günlərdə isə ABŞ administrasiyasının başqa bir nümayəndəsi Apple-ı istehsal prosesini ABŞ-a keçirməkdə ləngiməkdə günahlandırıb. CNBC-nin məlumatına görə, bu tənqidlərlə Apple-a və xüsusilə onun baş direktoru Tim Cook-a qarşı ABŞ prezidentinin ticarət üzrə müşaviri Peter Navarro çıxış edib. CNBC kanalında çıxışı zamanı məmur bildirib: “Trump-ın ilk prezidentlik müddəti zamanı Tim Cook öz müəssisələrini Çindən çıxarmaq üçün daim daha çox vaxt istəyirdi. Bu, Silikon Vadisi tarixindəki ən uzun “sabun operası”dır”.

     Navarro-nun sözlərinə görə, Apple şirkətinin iPhone istehsalını Çin xaricində təşkil edə bilməməsi fikri ağlabatan deyil və heç bir tənqidə tab gətirmir, çünki müasir istehsal texnologiyaları bu prosesi dünyanın istənilən yerində, o cümlədən ABŞ-da da qurmağa imkan verir. May ayında Donald Trump Tim Cook-a açıq şəkildə xəbərdarlıq edib ki, əgər Apple smartfon istehsalını Çində davam etdirərsə, həmin cihazlara 25% əlavə gömrük rüsumu tətbiq olunacaq. O, həmçinin Cook-a birbaşa olaraq belə deyib: “İstəmirəm ki, sən Hindistanda zavod tikəsən”.

     Mütəxəssislərin qənaətinə görə, ABŞ ərazisində istehsal olunan iPhone modellərinin qiyməti təxminən 3500$ təşkil edərdi ki, bu da hazırkı qiymətlərdən xeyli yüksəkdir. Apple-ın ABŞ-da tətbiq olunan idxal rüsumlarından yayınmaq cəhdləri, mart ayının sonunda Hindistandan ABŞ-a tamamilə iPhone-larla dolu bir neçə təyyarənin təcili göndərilməsi ilə də müşahidə olunub. Qeyd edək ki, Trump-ın ilk prezidentliyi dövründə Apple-a Texasda 3000$ dəyərində olan Mac Pro kompüterlərinin yığılmasını təşkil etmək mümkün olmuşdu. Hazırda isə Apple-ın istehsal prosesinin lokallaşdırılması ilə bağlı səyləri əsasən ABŞ-da yerli hesablama infrastrukturunda istifadə olunacaq server avadanlıqlarının podratçılar vasitəsilə yığılması ilə məhdudlaşır.