Cancer jurnalından dərc olunan araşdırmalara görə, ABŞ-dan olan tədqiqatçılar əvvəlki 14 araşdırmadan 25 mindən çox məlumatı toplayaraq analiz ediblər. Bu təhlildə baş və boyun nahiyəsində şişləri olan şəxslərin qidalanma vərdişlərini öyrənərək hansı faktorların önə çıxdığını müəyyən etməyə çalışıblar. Nəticələr onu göstərib ki, gündə 4 və daha çox fincan qəhvə içmək baş və boyun bölgəsində ümumi xərçəng riskini 17%-ə qədər azalda bilər. Qəhvə sevməyənlər üçün də yaxşı xəbər var. Araşdırmaya görə, çay da riski azaltmaqda mühüm rol oynaya bilər.

     Nəticələrə əsasən, gündə 4 və daha çox fincan qəhvə içənlərin ağız xərçəngi riski 30%, qırtlaq xərçəngi riski isə 22% daha aşağı olub. Qırtlağın alt hissələri üçün isə bu azalmanın 40%-ə qədər olduğu müşahidə edilib. Hətta kofeinsiz qəhvədə belə riskin təxminən 25% dəyərində azaldığı aşkar edilib. Ağız və qırtlaq nahiyəsindəki xərçənglərin çox təhlükəli olduğu məlumdur. Xüsusilə də siqaret çəkənlərdə risk daha yüksək olur. Araşdırmalara görə, tütün məhsullarından istifadə edən şəxlərdə bu cür şişlərin yaranma riski 10 dəfə çoxdur. Alkoqol istehlakında da risk eyni şəkildə artır. Buna görə də çay və qəhvə kimi içkilərin istehlak edilməsi daha faydalı nəticələr verir.

     Ancaq qeyd etmək lazımdır ki, hər araşdırmada bu cür nəticələr əldə edilmir. Bəzi tədqiqatlar hər gün orta və ya yüksək miqdarda qəhvə içməyin qoruyucu təsir göstərdiyini desə də, digərləri bu təsirin əhəmiyyətli olmadığını göstərib. Bu səbəbdən, araşdırma qrupunun üzvləri qəhvə və çayın təsirlərinin mürəkkəb olduğunu vurğulayaraq, daha çox məlumat və araşdırmaya ehtiyac olduğunu bildirirlər.