AI agentlərini qoruyan Reco 93,5 milyon manat investisiya cəlb edib

    “Reco” çərşənbə axşamı süni intellekt agentlərinin təhlükəsizliyi üzrə həllini genişləndirmək üçün 55 milyon dollar (təxminən 93,5 milyon manat) investisiya cəlb edib. Süni intellekt agentləri verilən tapşırıqları müəyyən dərəcədə müstəqil yerinə yetirən proqramlardır. Şirkət pulu yeni əməkdaşların işə qəbuluna, satışa, tərəfdaşlıqlara və müştəri dəstəyinə xərcləyəcək. Son investisiyadan sonra startapın cəlb etdiyi ümumi kapital 140 milyon dollara (təxminən 238 milyon manat) çatıb.

    Bu sərmayə fevralda cəlb olunan 30 milyon dollarlıq (təxminən 51 milyon manat) B seriyasının davamıdır. İnvestisiya raunduna “Reco”nun müştərisi “AT&T”nin investisiya qolu, həmçinin “Forestay” və “Quadrille Capital” qatılıb. “Reco”nun məlumatına görə, şirkətin dəyəri fevraldan bəri 2 dəfədən çox artıb. Dəqiq məbləğ açıqlanmayıb.

    “Reco” ötən ilədək əsasən SaaS xidmətlərini, yəni internet üzərindən işləyən proqramları müəyyənləşdirən və qoruyan məhsul satırdı. Yenilənmiş platforma əlaqələr xəritəsi quraraq süni intellekt agentlərini tətbiqlər, insanlar, hesablar və icazələrlə əlaqələndirir. Təhlükəsizlik komandaları agentin hansı məlumatlara çıxışı olduğunu görə, lazım olmayan girişləri bağlaya bilirlər. Sistem agentlərə verilən sorğuları və onların hansı alətlərə müraciət etdiyini də yoxlayır.

    “Reco” rəhbəri Ofer Klein deyib ki, şirkətlər süni intellekt agentlərini onları izləyə bildiklərindən daha sürətlə qurub işə salırlar. Platforma ABŞ-nin 100 ən böyük şirkətindən biri olan müştəridə əvvəllər məlum olmayan 21 000 agent aşkarlayıb. Başqa bir iri maliyyə şirkətində isə keçmiş əməkdaşın yaratdığı agentin “Salesforce” məlumatlarına çıxış əldə etdiyi üzə çıxıb. Agent həmin məlumatları şirkətin nəzarət etmədiyi domenlə paylaşa bilirdi.

    Süni intellekt agentlərinin təhlükəsizliyi bazarında artıq ən azı 24 şirkət işləyir. Bəzi həllər agentlərin işlətdiyi alətləri və məlumatlara çıxışını yoxlayır. Digərləri icazəsiz süni intellekt istifadəsini aşkarlayır. “Cymphony” ABŞ şirkətlərindən birində süni intellekt alətlərinin çata bildiyi təxminən 85 000 fayl tapdığını açıqlayıb. “HiddenLayer”ə görə, kritik sistemlərdə agent işlədən müştərilərin sayı 50-ni keçib.

    “Reco”nun müştərilərinin sayı 100-ü keçib. Biznesin təxminən 40 faizi maliyyə xidmətləri şirkətlərinin payına düşür. Şirkətin hər il təkrarlanan gəliri hazırda on milyonlarla dollar səviyyəsindədir və “Reco” bu göstəricinin cari ildə 3 dəfə artacağını gözləyir. Platforma 280-dən çox tətbiqlə işləyir, yeni tətbiqləri də bir neçə günə sistemə qoşmaq olur. Brauzer və şəbəkədən alınan məlumatlar platformaya birbaşa qoşulmayan tətbiqlərdəki agentləri də aşkarlamağa kömək edir.